أهلاً وسهلاً بك في مجتمع متين… خلال فترة من الفترات بالسنوات السابقة، في مجموعة من الناس ومن أماكن مختلفة تعرضوا لظروف قاهرة وقاهرة جداً، دفعتهم، أو لدقة أكبر، أجبرتهم قهراً، انهم يهجروا روتين وأسلوب حياتهم .. يهجروا أماكنهم المفضلة .. يهجروا الشغل والكاش .. يهجروا الصور معلقة .. يهجروا البيت ..يهجروا الخطط الموضوعة للشهر الجاي …  لجوءًا للأمن والأمان، وكلهم أملاً أنه الظروف هاي مؤقتة، للدرجة أنه بأولها، كان هَمْ الأمهات أنه يا رب ما ينتلي (يمتلئ) البيت غبرة (غبار). جزء من الناس هدول لجؤوا لمدينة نابلس، وتجمعوا ب ثلاثة مخيمات، مخيم بلاطة، ومخيم عسكر، ومخيم العين.  ب مجتمع متين، بدنا نعزز العلاقة بين اللاجئ لنابلس وبين أهل نابلس مدنيين كانوا أم فلاحين. وندرك أنه لفعل ذلك، لازم نعرف عنه أكتر، عن مجتمعه، وعن بداياته وصراعه مع الدنيا والعالم. وبهاي الحلقة، منحكي عن مخيم بلاطة، المخيم الأكبر بالضفة الغربية. مشاهدة ممتعة. لأي ملاحظات أو تعليقات:   البريد الالكتروني ل بودكاست بين جبلين- benjabaleen@konmateen.com