有時無聲仿有聲，不懂祈禱與慰問。倒不如遠離新聞，默默寫上禱詞，在自我慰藉中，他者也可能稍有共鳴。 詩篇十二篇5節 「耶和華說：因為困苦人的冤屈和貧窮人的歎息，我現在要起來，把他安置在他所切慕的穩妥之地。」 主啊，你係睇顧軟弱人嘅上帝， 11月26日嗰個下晝，大埔宏福苑著火。 四十三個鐘頭嘅烈火，一百二十八個街坊就咁走咗。 詩篇十三篇1-2節 「耶和華啊，你忘記我要到幾時呢？要到永遠嗎？你掩面不顧我要到幾時呢？我心裡籌算，終日愁苦，要到幾時呢？」 主啊，我哋真係好痛。 我哋問：點解？點解會咁？點解係佢哋？ 我哋為嗰啲走咗嘅人心痛： 嗰啲由細住到大嘅公公婆婆，喺自己最熟悉嘅地方離開。 嗰啲照顧佢哋嘅姐姐，遠離家鄉，喺香港奉獻生命。 嗰個六個月大嘅BB，同佢阿嫲。 嗰位消防員何偉豪，為咗救人而犧牲。 約翰福音十一章35節 「耶穌哭了。」 主耶穌，你都識得喊。 當拉撒路死咗，你雖然知道你會叫佢返生，你都係喊咗。 因為你睇到啲人嘅痛，你感受到佢哋嘅失去。 而家，我哋相信你都同我哋一齊喊緊。 詩篇三十四篇18節 「耶和華靠近傷心的人，拯救靈性痛悔的人。」 主啊，我哋為嗰啲仍然等緊嘅人祈禱： 有啲家庭仲未搵到屋企人，日日夜夜都係煎熬。 求你靠近佢哋，喺最黑暗嘅時候，俾佢哋感受到你同在。 願佢哋早日得到答案，可以有個交代。 耶利米哀歌三章22-23節 「我們不致消滅，是出於耶和華諸般的慈愛；是因他的憐憫不致斷絕。每早晨，這都是新的；你的誠實極其廣大！」 主啊，我哋為嗰四千幾個流離失所嘅街坊祈禱： 一夜之間冇咗屋企，所有嘢都燒埋。 四十幾年嘅回憶就咁冇咗。 求你每一個早晨都用新嘅憐憫遮蓋佢哋， 喺酒店、臨時屋度保守佢哋， 願社區、教會、社工繼續同行。 詩篇一百四十七篇3節 「他醫好傷心的人，裹好他們的傷處。」 主啊，我哋為嗰啲救人嘅祈禱： 兩千幾個消防同救援人員，喺500度高溫入面搜救。 佢哋見到嘅嘢，會一世記住。 求你醫好佢哋嘅傷——唔單止身體上嘅傷，仲有心入面嘅創傷。 求你親自裹好佢哋每一個傷處。 彌迦書六章8節 「世人哪，耶和華已指示你何為善。他向你所要的是甚麼呢？只要你行公義，好憐憫，存謙卑的心，與你的神同行。」 主啊，我哋唔明白點解會咁。 點解啲窗會封死？點解火警鐘冇響？點解火會燒得咁快？ 但我哋知道你要我哋行公義、好憐憫。 求你俾智慧調查嘅人，搵出真相。 求你俾勇氣決策嘅人，作出改變，令呢啲事唔會再發生。 詩篇一百零三篇13-14節 「父親怎樣憐恤他的兒女，耶和華也怎樣憐恤敬畏他的人！因為他知道我們的本體，思念我們不過是塵土。」 主啊，喺呢三日哀悼期入面， 當我哋降半旗、默哀、點蠟燭—— 求你提醒我哋，每一個數字背後都係一個人、一個家庭、一個故事。 一百二十八唔係統計數字，係我哋嘅鄰舍。 你認識佢哋每一個，你記得佢哋嘅名。 羅馬書十二章15節 「與喜樂的人要同樂；與哀哭的人要同哭。」 求你將我哋嘅眼淚變成行動， 將我哋嘅心痛變成關愛， 將我哋嘅記憶變成守望。 啟示錄二十一章4節 「神要擦去他們一切的眼淚；不再有死亡，也不再有悲哀、哭號、疼痛，因為以前的事都過去了。」 主耶穌，我哋等緊嗰日—— 冇火災、冇死亡、冇眼淚嘅日子。 喺等嗰日之前，求你與哀哭嘅人同哭， 喺最黑暗嘅時候，成為我哋嘅光。 羅馬書八章26節 「況且，我們的軟弱有聖靈幫助；我們本不曉得當怎樣禱告，只是聖靈親自用說不出來的歎息替我們禱告。」 我哋唔知點禱告先啱， 但你明白我哋心入面嘅痛。 阿們。 有關Gofundme 神學Pokeman go card： https://www.gofundme.com/f/you-are-not-alone-biblical-cards-for-everyday-struggles 想直接買聖經Pokeman go card? Link here: https://soloist.ai/kairos-en/tw 這個聖誕節日，我想嘗試一次音樂神學工作坊，做一個實驗：如果我們允許音樂、寂靜、身體成為認識上帝的途徑，會怎樣呢？我們會一起聽Billie Eilish的音樂，在音樂中安靜，允許它喚起我們內在的情緒和記憶，允許你真實、允許你脆弱、允許你帶著所有疑問和創傷來到上帝面前。 工作坊詳情： 日期： 2025年12月26日（Boxing Day） 時間： 下午3:00 - 5:00（香港時間） 地點： 九龍佑寧堂（油麻地佐敦道4號） 自由奉獻 | 報名詳情：https://forms.gle/zLppXdmxDq7fBDn78