اجعلوا قلبكم على طرقكم الجزء الرابع

حجَّي 2: 20  " وَصَارَتْ كَلِمَةُ الرَّبِّ ثَانِيَةً إِلَى حَجَّي، فِي الرَّابعِ وَالْعِشْرِينَ مِنَ الشَّهْرِ قَائِلاً:  21« كَلِّمْ زَرُبَّابِلَ وَالِي يَهُوذَا قَائِلاً: إِنِّي أُزَلْزِلُ السَّمَاوَاتِ وَالأَرْضَ،  22 وَأَقْلِبُ كُرْسِيَّ الْمَمَالِكِ، وَأُبِيدُ قُوَّةَ مَمَالِكِ الأُمَمِ، وَأَقْلِبُ الْمَرْكَبَاتِ وَالرَّاكِبِينَ فِيهَا، وَيَنْحَطُّ الْخَيْلُ وَرَاكِبُوهَا، كُلٌّ مِنْهَا بِسَيْفِ أَخِيهِ.  23 فِي ذلِكَ الْيَوْمِ، يَقُولُ رَبُّ الْجُنُودِ، آخُذُكَ يَا زَرُبَّابِلُ عَبْدِي ابْنُ شَأَلْتِيئِيلَ، يَقُولُ الرَّبُّ، وَأَجْعَلُكَ كَخَاتِمٍ، لأَنِّي قَدِ اخْتَرْتُكَ، يَقُولُ رَبُّ الْجُنُودِ».

الرب يسوع هو الملك والرب بيكلم زربابل خادمه عن خدمته على فم نبيه حجي بالعدد 21- 22 من القراءة: مع اني انا الملك اللي رح أُزَلْزِلُ السَّمَاوَاتِ وَالأَرْضَ، 22 وَأَقْلِبُ كُرْسِيَّ الْمَمَالِكِ، وَأُبِيدُ قُوَّةَ مَمَالِكِ الأُمَمِ، لكنك انت عبدي اللي اخترتك وبيحكي الرب ، " وَأَجْعَلُكَ كَخَاتِمٍ، لأَنِّي قَدِ اخْتَرْتُكَ". لما النبي بيحكي هاي الجملة الوالي زربابل بيفهم ايش معناها. الخاتم الملكي هو اللي كانوا الملوك يستخدموه عشان يختموا على رسائلهم، وكان يُستخدَم زي الامضاء لما يضغطوا فيه على شمع طري موضوع على وثيقة مكتوبة. كل مهمة رسمية ضروري تكون مختومة من الملك للمصادقة على المهمة من الملك، ولتأكيد السلطان بكامل الصلاحيات لصاحب المهمة وصاحب الرسالة عشان يتمم مهمته ويكمل رسالته.

الله برسالته لخادمه زربابل بأكد على مصادقته لمهمته كوالي لشعبه، وبصادق على رسالته انه يبني هيكل الرب، وبيعطيه كامل السلطان والصلاحيات والقدرة والامكانيات عشان يكمل اللي طلبه منه الله. اديش هاد تشجيع وتعضيد وتأكيد كبير كان للوالي بالمهمة اللي اوكلت اله.

مكتوب في افسس 1: 13 الَّذِي فِيهِ أَيْضًا أَنْتُمْ، إِذْ سَمِعْتُمْ كَلِمَةَ الْحَقِّ، إِنْجِيلَ خَلاَصِكُمُ، الَّذِي فِيهِ أَيْضًا إِذْ آمَنْتُمْ خُتِمْتُمْ بِرُوحِ الْمَوْعِدِ الْقُدُّوسِ. خليني احكيلك لما آمنا الله سكن فينا بالروح القدس وصرنا احنا الهيكل للروح القدس، وختمنا بروحه، اعلان عن ملكه لحياتنا لانه الرب هو الملك، واعلان عن مصادقته علينا، وعربون للحياة الابدية.

الروح القدس هو الختم اللي بيصادق على الرسالة اللي حاملينها وبيضمن تتميمها، هو الختم اللي بأكد على سلطان الله بكامل امكانياته وصلاحياته وقدرته لتتميم المهمة اللي اوكلها النا. وهو الختم اللي بأكد النا مهمتنا بتكميل بناء الهيكل اللي هو انفسنا وحياتنا عشان نكمل نعبد الرب ونمجده ونعلن ملكه علينا.

بالنهاية يا مباركين، أولا: بناء هيكل الرب اولوية خلينا نتشجع بنهاية سنة وبداية سنة جديدة انه نرتب اولوياتنا صح ونبني هيكل الرب وما نجمع لكيس منقوب لانه الهك هو اللي بسدد المطلوب. ثانيا:  ندرك انه مجد الله خطة ازلية والله رح يرفعنا من مجد الى مجد لانه مجد البيت الاخير اعظم من مجد الاول. ثالثا: ننتبه من عدوى الخطية ونعمل فوكس على التقديس والتطهير، لانه الكهنة رح ينسالوا عن تطبيق الشريعة، لكن مش على حساب اعمالنا ولكن على حساب اساس حضور الله في وسط هيكله على حساب عهد الفداء بدم الرب يسوع المسيح. ورابعا: نخضع لملك الرب يسوع وسلطانه بحياتنا و نتأكد انه الله فرزنا وختمنا بروحه واعطانا كامل الامكانيات والقدرة والصلاحيات لتكميل مهمتنا وتكميل بناء الهيكل عشان مجده يظهر فينا.

كل عام وانتو بخير