Ek din subah neend tootati hai aur ek aisa ehsaas hota hai. Jo agar us din neend aise na khulti to kabhi dhyan na reh paata. Aur wo ehsaas us MEHAK ka tha jo ghar ke mandir me rakhe 'Gende ke phool, jalte hue diye aur sulaghti hui dhoop' me se aa rahi thi. Har ek MEHAK ki bahut important jagah hai humaari life me. Jiska ehsaas is busy life me hum nahi karte. Kabhi dhyan de to yahi MEHAK humaare mann ko, humaare ehsaas ko, humaari feelings aur hume ekdum badal deti hai. Ek kitaab kholta hu aur uske panno se aane wali MEHAK kehti hai, ke darwaza, TV sab band kar du aur us ehsaas ke sath kahani me kho jau. Bathroom me mooh dhone jaata hu aur us MEHAK ke milte hi thodi si aftershave me bhi laga leta hu. Wo MEHAK ekdum papa ki MEHAK lagti hai. Taiyaar hone ke liye jaise hi almaari kholta hu to kapdo se aati MEHAK ek apnepan ka ehsaas de jaati hai. Car me chaabi lagat hu aur garam hone ka wait karta hu us pal car ki MEHAK aati hai aur 'Meri Gaadi' wala ehsaas hota hai. Subah ki us os me geeli sadakon pe idhar - udhar udate eucalyptus ke un patto ki MEHAK. Bachapan ki us early morning cycling ka ehsaas kara deti hai. Kabhi - Kabhi khaali kitaab ke bhar jaane ke baad us pen ki ink ki MEHAK ka ehsaas. Examination hall le ja baithati hai. Sham ko yun hi kabhi tehalte - tehalte railway station ke pas se guzarta hu aur waha se aane wali MEHAK ka ehsaas na jaane kis safar le jaata hai. Har kisi ke ghar ki alag MEHAK hai. Mummy Papa ke room ki alag MEHAK hai. Ganga ke ghaaton ki alag MEHAK hai. Sham ko bazaaron se aati jalebi- samoson ki alag MEHAK hai. Aur yeh MEHAK pal, din, saal... Yeh MEHAK zindagi hai.