សារព័ត៌មានសិង្ហបុរី CNA នៅថ្ងៃសុក្រទី២១វិច្ឆិកា បានចុះផ្សាយអត្ថបទវិចារណកថាមួយ ដោយស្រង់សម្តីអ្នកជំនាញនិងរបាយការណ៍អន្តរជាតិ អំពីករណីឧក្រិដ្ឋកម្មឆបោកអនឡាញនៅកម្ពុជា។ អ្នកជំនាញនិងរបាយការណ៍អន្តរជាតិ បានលើកឡើងថា ការបង្រ្កាបបទល្មើសឆបោកអនឡាញចុងក្រោយនៅកម្ពុជា គ្រាន់តែជាឆាកល្ខោនបំភាន់ភ្នែកអន្តរជាតិប៉ុណ្ណោះ។ បំភាន់ភ្នែកអន្តរជាតិ ដ្បិតថា ការបង្រ្កាបនោះគឺចាប់បានតែឧក្រិដ្ឋជនតូចតាច។ លើសពីនេះ អ្នកជំនាញនិងរបាយការណ៍អន្តរជាតិ លើកឡើងទៀតថា កម្ពុជា គ្មានឆន្ទៈពិតប្រាកដក្នុងការបង្រ្កាបឧក្រិដ្ឋកម្មឆបោកអនឡាញទេ ព្រោះថាបទល្មើសបច្ចេកវិទ្យានេះ កន្លងមកបានចិញ្ចឹមសេដ្ឋកិច្ចកម្ពុជាក្នុងរង្វង់ទឹកប្រាក់ពីចន្លោះ១២ទៅ១៩ពាន់លានដុល្លារសហដ្ឋអាមេរិក។