Қазақстандағы банк жүйесі қоғамдағы басты даулы тақырыптардың біріне айналды. Мемлекет те халықтың уәжін ескеріп, заңға өзгерістер енгізіп жатыр. Осы тұста Мәжіліс депутаты Мұрат Әбенов банктердің жұмысына қатысты бірнеше өзекті мәселені көтерді. Оның айтуынша, шамадан тыс еркіндік пен бақылаудың әлсіреуі банктерді заңсыздыққа итермелеп, тұтынушыларды қорғау тетіктерін әлсіреткен.

Сұхбат барысында депутат бірқатар маңызды проблемаларды атап өтті:

– 2020 жылдан бері банк жүйесіндегі бақылаудың төмендеп, алаяқ схемалардың күшейгені;

– банктер үшін тұтынушылық несие ең табысты бағытқа айналғаны;

– банкке бармай, құжат көрсетпей рәсімделген несиелердің барлығы заңсыз екені;

– биометрия заңсыз өтсе, мұндай несиелерді банк толық өтеуі тиіс екені;

– кей банктердің биометрияны өздері заңсыз өткізген фактілері;

– банктердің алаяқтармен сыбайлас болуы мүмкін екені;

– несие рәсімдеген қызметкерлерге қылмыстық жауапкершілік енгізудің маңыздылығы;

– банктер арасындағы бәсекенің жоқтығы пайыздық мөлшерлемені қолдан көтеріп отырғаны.

Әбеновтің дерегінше, соңғы екі аптада 350-ден астам азамат несие дауына шағымданған. Бұл банк саласындағы мәселенің қаншалықты тереңдегенін көрсетеді.