Op der Affiche: dasRADIAL, Sheebaba a Cleveland. An de Klang gëtt iwwerreecht. Den Entrée ass fräi, jiddereen ass wëllkomm. Den Yves Stephany gëtt dem Maurice Molitor Detailer iwwer d'Concerten.

De Michel Ries zitt sech aus dem professionelle Vëlossport zeréck, nodeems seng Ekipp Arkéa-B&B-Hotels opgehal huet. Mir froen hien, wéi et him domat geet.

Et steet eng grouss Ännerung fir de Schoulsystem dëst Joer un. Nach kuerz virun der Chrëschtvakanz hat d'Chamber ënner anerem de Projet de loi gestëmmt, fir déi optional Alphabetiséierung op Franséisch. Dee sougenannte Projet Alpha hat fir ganz vill Diskussioune gesuergt. Déi eng maache sech Suergen zum Beispill ëm d'Méisproochegkeet, fir déi aner ass et ee wichtege Schrëtt fir d'Chancëgläichheet an der Schoul. An den 3. Dezember gouf de Projet de Loi dann ugeholl. D'Morgane Weidig huet sech en Iwwerbléck verschaf an e puer vun den Ännerunge gesammelt, déi dëst Joer op de Schoulsystem duerkommen.

Mir froen de President vun der Lëtzebuerger Societéit vun de Kannerdokteren, den Dr. Serge Allard.

Allerspéitstens zanter dem russeschen Ugrëff op d’Ukrain huet och fir de Rescht vun Europa d’Theema Sécherheet a Verteidegung nees absolut Prioritéit. Dat gëllt besonnesch fir déi Gebidder, déi no u Russland leien an eng Invasioun fäerten. Esou zum Beispill am baltesche Mier. Schweden ass zanter 2024 Member an der NATO an huet am leschte Joer säin Arméisbudget staark erhéicht. Wéi huet de Bäitrëtt d’NATO verännert a wéi plangt Schwede seng militäresch Zukunft? De Max Tholl huet zu Göteborg bei engem Expert nogefrot.

De Rendez-vous an der Luxexpo um Kierchbierg fir jiddereen, dee gäre selwer mat den Hänn schafft a bastelt.

De Mercosur-Handelsaccord tëschent der EU a véier südamerikanesche Länner ass nach ëmmer net an dréchenen Dicher. A Frankräich zum Beispill ginn d’Bauere weider massiv op d’Strooss fir dogéint ze protestéieren. Mee och zu Lëtzebuerg ass d’Begeeschterung iwwer den Accord bei de Baueren net grad grouss. Et misst een d’Bedenke vun de Baueren eescht huelen, esou den EU-Agrar-Kommissär Christophe Hansen, deen d'Agrarministeren op eng Reunioun zu Bréissel invitéiert hat. Wat koum dobäi eraus? Explikatioune vun eiser EU-Korrespondentin Danièle Weber

Am Norde vum Land steet zanter 30 Joer an enger onscheinbarer Hal e grousse Schatz un ale Maschinnen an Apparater drop ze waarden, datt dësen Dram Realitéit gëtt. Dee jonke Student Tom Poecker wëllt elo dofir suergen, datt de Projet Nationalmusée ëmgesat gëtt.

Vertrieder:inne vun der Justiz an déi zoustänneg Ministesch hunn no hannen an no vir gekuckt op der Neijoerschreceptioun an der Cité judiciaire.

Datt de venezuelanesche President Nicolás Maduro vun den USA entféiert gouf, huet international fir vill Reaktioune gesuergt. Mee wéi gesi Venezuelaner zu Lëtzebuerg d'Situatioun? De Jo Welfringer huet mat zwee vun hinne geschwat.

Mir froen de Luca Mathias vu Meteolux.

Firwat heescht déi nei Steierklass U? Wéi ginn d'Steierabattemente fir Kanner gerechent, wann d'Elteren net méi zesumme mee eenzel besteiert ginn? A wéi soll d'Steierverwaltung mat der méi grousser Unzuel un Dossieren eens ginn? De Finanzminister Gilles Roth erkläert seng Reformpläng ronderëm d'Aféierung vun enger eenzeger Steierklass.

Schengen oder nach d'Nordstrooss, de Robert Goebbels huet seng Zäit als Minister markéiert. De Jean-Claude Juncker, de Ben Fayot an de François Bausch hu säi Wëllen a säin Engagement als LSAP-Minister ervirgehuewen.

Déi sougenannte Koalitioun vun de Wëllegen huet sech engagéiert der Ukrain Sécherheetsgarantien zoukommen ze loossen. Et ass net fir d’éischte Kéier, datt déi Decisioun geholl gouf - fir de Lëtzebuerger Premier huet een awer op der Reunioun vu gëschter “enorm” Fortschrëtter gemaach. Wou genee? An: Kann een den USA nach vertrauen? De Premier Luc Frieden huet gëschter an enger Online-Pressekonferenz op dës an aner Froe geäntwert.

De Jeff Schinker iwwer d'Theaterstéck mat deem Titel, dat muer oder iwwermuer am Stater Kapuzinertheater um Programm steet.

D'Reaktioun vum fréieren Ausseminister Jean Asselborn op dat, wat geschitt ass an eventuell nach kënnt.

Mir froen eise Korrespondent Max Tholl, wéi d'Budgetsdiskussiounen am neie Joer viruginn.

Deen neie Bio-Aktiounsplang ass manner ambitéis wéi dee vu virdrun. Wat seet d'Vereenegung fir Biolandwirtschaft dozou? Froen un hir Direktesch Daniela Noesen

Wat rechtfertegt déi héich Käschte fir Reese vun Deputéierten (an offizieller Missioun)? Froen un de Chamberpresident Claude Wiseler

A Groussbritannie sinn am neie Joer Reklamme fir Junk Food, also ongesond Iessen, just nach owes op der Tëlee erlaabt, an online dierfen se guer net méi gewise ginn. Dëst soll Iwwergewiicht bei Kanner verhënneren. An dat ass op der Insel ee grousse Problem.