De Jeff Schinker war bei engem vun de Concerten zu Bologna dobäi.

D'Hären-Nationalekipp huet gëschter hire leschte Match an der WM-Qualifikatioun gespillt. Wéi hunn d'Rout Léiwen sech geschloen? Doriwwer schwätze mir mam Simon Larosche.

Deen éischte Frascht suergt fir glat Stroossen a potentiell Problemer am Verkéier. Fir dat ze verhënneren, streeën d’Ponts et chaussées op de Staatsstroossen an Autobunne Salz. Wéi preparéiere si sech op d'Saison, dat freet d’Paule Rodesch de Ralph di Marco an der Salzhal zu Bartreng.

En däitsch Geriicht huet viru Kuerzem en Urteel dozou gesprach. Mir froen no, ob dat och en Impakt op Lëtzebuerg huet.

Déi aktuell CSV-DP Koalitioun zu Woltz steet wéi et schéngt virum Broch. D’DP wéilt elo mat der LSAP zesummeschaffen. Wat seet d'CSV-Buergermeeschtesch Carole Weigel dozou?

Beim Musclical gi Fitnessgeräter zu Museksinstrumenter an den Training gëtt zum Concert.

D’Menstruatioun war joerhonnertelaang en Tabutheema, obschonn et zur Liewensrealitéit vu ronn der Hallschecht vun der Weltbevëlkerung gehéiert. D’Ausstellung “Et leeft” retracéiert d’Evolutioun vun de Menstruatiounsproduiten a weist d’Meenungen an Diskussiounen aus de leschte Joerzéngte ronderëm d’Theema. D'Paule Rodesch war sech d'Expo ukucken.

40 Joer no enger Serie vu Bommenattentater uechter Lëtzebuerg wärend dem Kale Krich fänkt haut deen zweete Bommeleeër-Prozess un. Siwe fréier Gendaarme sinn ugeklot am éischte Prozess vu virun 11 Joer Falschaussoe gemaach ze hunn. Si kréien domat net virgeworf, d'Co-Auteure vun den Attentater gewiescht ze sinn. Well wien d'Bommeleeër waren, ass no 40 Joer nach ëmmer net gewosst. Wéi ass dat ze erklären? E Réckbléck op eng aussergewéinlech Staatsaffär

Mir froen de Fokus-President Marc Ruppert, wéi seng Partei d'Wieler:innen an den nächste Jore wëllt iwwerzeegen.

D'Nationalekipp vun de Männer spillt den Owend hire leschte Match an der WM-Qualifikatioun. Mir froen dee fréieren Nationalspiller Roland Schaack, wat hie sech erwaart.

Bicherfrënn hu se sécher scho laang am Kalenner stoen: Dëse Weekend sinn nees d’Walfer Bicherdeeg. Et ass schonn déi 30. Kéier datt déi gréisste Bicherfoire am Land stattfënnt. D'Paule Rodesch geheit e Bléck hanner d’Kulissen a mécht sech e Bild vun de leschte Virbereedungen.

De Philippe Weis, Chief resilience officer vun der Stad Esch, ass am Studio. Mir wëlle vun him wëssen, wat ee lokale Resilienz-Officer mécht.

D'Wanteraktioun um Findel mécht muer hir Diren op. De Pierre Reyland schwätzt live vun der Plaz mat Responsabelen,.

Ass d’Brandmauer no riets elo definitiv gebrach? Déi Fro gëtt sech am Europaparlament gestallt - no engem Vott gëschter (13.11.) iwwer dat europäescht Liwwerkettegesetz. Fir een ofgeschwächten Text vun där Direktiv huet nämlech eng Majoritéit gestëmmt, déi sech haaptsächlech aus Vertrieder:inne vun der Europäescher Vollekspartei a vu rietsen- respektiv rietsextreeme Fraktiounen zesummegesat huet. Dat gouf et esou virdrun nach net - d’Sozialisten, déi Liberal a Gréng hunn duerno net mat Kritik gespuert - si werfen der EVP Erpressung vir. D’Partei hätt amplaz e Kompromëss an der politescher Mëtt ze sichen, bewosst mam rietse Bord zesummegeschafft. D’Danièle Weber iwwer dee Vott an doriwwer, wat dat fir d’Zukunft bedeit.

Mee wat erwaarden d'Handwierker vun der Regierung? Mir froen hire Chefekonomist, de Max Urbany.

Dëse Samschdeg a Sonndeg (15. a 16.11.) steet zu Bouneweg nees d‘Gesellschaftspill an all senge Formen am Mëttelpunkt, da geet d‘Game On nämlech a seng nächsten Editioun.

Am Summer sinn zwee jonk Lëtzebuerger op de Mont-Blanc geklommen an hunn dat och an engem Dokumentarfilm festgehalen. De Maurice Molitor huet mat hinne geschwat.

Zesumme mat enger Grupp vu Jonken tëschent 15 a 25 Joer gouf an de leschte Méint um radio 100,7 un enger neier, réng digitaler Offer fir e jonke Public zu Lëtzebuerg geschafft. Vum Logo, bis Konzept an och Contenue waren déi jonk Kandidaten a Kandidatinnen, déi sech fir de Programm gemellt haten, vun Ufank u mat involvéiert. Dat éischt Format: Still Loading …, e Video-Podcast mam Cheryl (25) an dem Laure (20), mécht den Ufank. All zweeten Donneschdeg schwätzen déi Zwee iwwer d’Transitioune vum Liewen, an deenen net ëmmer alles direkt kloer ass - déi Phas tëschent Schoul an Uni, vun éischte Jobs an éischte Bezéiungen, bis hin zu Decisiounen an neien Ufäng. Mat vill Humor, Real Talk an heiansdo och mat Gäscht gräife si Theemen op, déi si, genee esou wéi vill aner Jonker, an hirem Alldag beschäftegen. D’Laure, Host vu Still Loading …, an d’Catherine, Programm-Produzentin vum Jugendprogramm, stellen d’Konzept vu komma an déi éischt Episod vum Vidcast am Moiesstudio vum radio 100,7 vir. Dir wëllt direkt an déi éischt Episod vu "Still loading ..." eralauschteren? Da kënnt Dir online maachen op Spotify, YouTube oder Apple Podcast.

Haut viru genee zéng Joer koum et zu Paräis zu den Terrorattacken, bei deenen 130 Persounen hiert Liewe gelooss hunn - de Groussdeel vun hinnen am Concertssall Bataclan. Frankräich trauert haut ëm d’Affer mat enger Zeremonie an der Aweiung vun engem Gedenkuert. Wéi huet d’Terrornuecht d’Land verännert a wéi geet een haut mat der Terrormenace ëm. Eng Analys vun eisem Paräisser Korrespondent Max Tholl

Déi spuenesch Pop Sängerin Rosalía huet en neien Album erausbruecht mam Titel “LUX”, deen an der internationaler Musekszeen, a virun allem an de Social Media, besonnesch vill Opmierksamkeet kritt. Ob dësem Album fënnt ee sensibel Popballaden a Lidder, déi dozou opfuerdere matzedanzen, awer och Flamenco, dee matrappt, a gefillsvolle Fado fannen hir Plaz op dësem Album. A wat besonnesch interessant ass, ass datt een hei och vill klassesch Influenzen erëmfënnt. Grond genuch fir d'Cally Kerschen aus der Museksredaktioun vum 100,7 an d'Carole Mallinger aus der Opus-Redaktioun d’Käpp zesummenzestiechen a gemeinsam fir Iech e klengen Abléck an dëse besonneschen Album ze ginn. Am Moiesstudio hu si iwwer dat Besonnescht vun dësem Album geschwat. Wann Dir nach en anere Bléckwénkel op dësen Album wëllt kréien, da kennt Dir och bei eis Kolleege vum Opus 100,7 an d'Mediathéik kucke goen. Do fannt Dir och nach e Gespréich, axéiert op d'Elementer aus der klassescher Musek, déi op dësem Album ze fanne sinn. D'Cally Kerschen an d'Carole Mallinger waren op Besuch beim Lex Kauffmann am Harmonesche Moien fir iwwer den Album “LUX” vun der Rosalía ze schwätzen.