Ide hütige Episode bespreched 2/3 vo TGW die letzte zwei Runde vor de Winterpause und ziehnd es Fazit nach de Hiirundi. Winti het geg de Wintermeister us Thun wenig chöne usrichte und verlürt mit 1:4 – zrede giht vorallem au das wo nebed em Platz passiert isch. Und GC holt sich unter de Wuche en sensationelle 6:2 Sieg in Bern, müend sich denn in typischer GC-Manier aber direkt wieder SG gschlage geh. Dezue erreicht eus vom FCZ e grossi Nachricht die Wuche: De Malenovic isch offiziell Gschicht.
D Jubiläumsepi isch da! Zfiire gihts aber wie fast immer nöd allzu vill: Im Kantonsderby trenned sich de FCZ und Winti mit 2:2 Unendschide, für eimal isches Winti gsi wo sich i letzter Sekunde dank vill Mithilf vom FCZ no en Punkt erkämpft het. Und GC? Ja GC macht halt GC Sache und verlürt in Sion zum dritte Mal hinterenand mit 0:1 und das no mit verschossendem Penalty. Mer sinds eus ja gwöhnt, drum hüt für eimal: Cheers to us! 🥂
De Samichlaus hets a dem Wucheend nöd mit allne guet gmeint. De GC Spiller muess er vill usem rote Buech vorlese, nach dere Leistig gege Servette gihts wenig Positivs usezhebe. De Tim isch pisst. De FCZ hingege zeigt sich sit zwei Wuche als Musterschüeler, nachem Derbysieg folged Nüssli, Manderindli und 3 Pünkt in St. Galle. Und wenns nachem David gaht, hilft bim FCW und em Rahmen aktuell nur eis: Ruetehiib ad Birre! Trotz de guete Leistig gege Basel isch er vorallem wegen Cupout unter de Wuche gar nöd zfride.
Unstimmigkeite ide FCZ-Füehrig vs s harmonische Duo bi GC: Ide Derby-Episode besprechemer vorallem was vor und nachem Match passiert isch, wo d Harmonie stimmt und wo weniger. Pünkt gihts aber nur für de FCZ. Zuedem derf mer sich uf en ghypte David freue, immerhin het sis Winti in Luzern wichtigi 3 Pünkt gholt. Obwohl: Ganz so sicher isch sich de David dere Sach nonig, heter us de Vergangeheit glernt?
De Patrick Rahmen spillt zum erste Mal geg sin Ex-Verein YB und au wenn mer nöd vill erwartet het in Bern tuet das 0:5 us Winti-Sicht sehr weh: De David isch im Loch. Am Raphi sin FCZ holt im Wallis nachere fragliche erste Halbziit no en Punkt, so ganz zfride isch er aber trotzdem nöd. Und GC erkämpft sich gege Basel es Unentschiede, verlürt da debi aber zwei Spiller wegere rote Charte – und das direkt vorem Derby.
Es Schlusspektakel uf de Schützi ändet mit Becherwürf uf de GC-Trainer Scheiblehner. Innere hitzige Schlussphase trifft de Hunziker zum vermeintliche Siegtreffer für Rotwiis und churz druff abe macht de Muci denn s tatsächlich entscheidende Goal, GC günnt und de Scheibi leiht sich mit de Winti Fans ah.
Glichziitig spillt de FCZ dihei gege Luzern und nach 45 Minute gsehts düster us: 0:2 hine, s einzige Goal womer macht wird aberkennt. Was ide zweite HZ passiert, het sich de Raphi nöd chöne erträume: D Zürcher dreihed de Match und günned dankeme Kenny-Penalty ide Nachspielziit mit 3:2. Thema Milos erledigt?
Hoi Zäme, mier sind de Raphi und de Tim und sind Fans vo Zürcher Fuessballclubs. Hüt treffemer eus ide wüchentliche Selbsthilfegruppe und redet über eusi traumatische Erlebnis vode letzte Wuche. De FCZ verlürt sowohl in Basel wie au geg Lausanne – für d Fans isch klar, wer s Problem isch. Und GC wird nacheme starche 3:3 geg YB am Wucheend uf de Bode vode Tatsache gholt: Es 0:6 in Luzern wirft ganz vill Frage uf und schreiht nachere wiitere Hinterfregig vo de Bsitzergruppe.
So richtig im Schiff gstande isch vorallem GC: D Hoppers tauched in St. Galle und verlüred völlig verdient mit 0:5. Vome Usrutscher chamer bim FCZ nüme rede: Trotz Trainer-Kick verlürt am Raphi sis Team mit 2:3 gege YB. Und de FCW spielt unter Neo-Trainer Rahmen guete Fuessball, wird aber ide Nachspielziit chalt duscht: De Diaby trifft is eigene Goal, trotzdem gihts en wichtige Punkt für Winti.
De Decarli nach 12 Minute, de Raphi nach 90 und de FC Winti scho die ganz Saison... Ide hütige Folg lueged de Raphi und de Tim uf e mässig erfolgrichs Wucheend vode Zürcher Clubs zrugg. De FCZ cha nachdem Derby kei Reaktion zeige und verlürt im Tessin, au GC bringt i Unterzahl keis Goal stand und unterliit Sion mit 0:1 und de FCW cha froh si, isches in Basel bim 0:3 blibe.
GC setzt im Zürcher Derby es Statement: Grad mit 3:0 schlönds de FCZ mitere fantastische Leistig, was natürlich en euphorisierte Tim und en konsternierte Raphi im Pöde bedüütet. En Tag später verlüürt am David sin FCW nach 2-Tore-Vorsprung no mit 2:4 gege de FC Lugano – de David gseht rot!
De FCZ verlüürt und Winti & GC günned? Nur im Cup! Nach de 7. Rundi ide Super League isch sozäge wieder alles bim alte: Winti chunt in Genf vo Servette drunder und de David isch bereits versuecht, s Abstiegsbarometer es ersts Mal fürezne. Au wenn nöd ganz so ghyped wie de Trainer Scheiblehner findet de Tim gueti Wort für sis GC trotz Niederlag im Tessin. Und de Raphi derf nachem gruusige Cup Out en wichtige Sieg geg de Leader us St. Galle fiire.
Die zweiti Cup Rundi isch gspillt und nur no 2 vo 3 sind debi. De FCZ holzt in Nyon vom Penaltypunkt und muess sich nach de bittere Niederlag auch no de Provkatione vom Heimteam stelle. Provoziert worde isch au in Schaffhuuse, mitem bessere Endi für Winti. Trotz em 4:0 Sieg isch de David nöd ganz happy mit em Uftritt. Und GC nimmt sich s Cup Motto sehr zu herze: Hauptsach wiitercho! Imene Grottekick schlönds Bellinzona mit 1:0.
En dopplete Tsawa, en gnüsslete Plange und de Opa Buess: Ide 6. Rundi isch einiges gloffe. De Scheiblehner holt sin erste Meisterschaftssieg als GC Trainer – und de Zvonarek isch nöd ide Startelf? De FCZ holt sich imene wilde Spiel dank Pfoste- und Latteglück en Sieg gege Servette – isch ez de Tsawa genau so es Tripple-A Talent wo de Milos immer verzellt? Und bi Winti isch de Uli nach VAR-Pech und eme 2:3 geg Sion wider hässig uf d Schiedsrichter – und mier fräged eus: Cha de Momoh de ersehnti Gomis-Ersatz werde?
Di Giusto weg. Gomis weg. Geld da? D Sorgefalte vom David sind gross, nachdem ez au no de Gomis zu Schalke isch. Wird wiiter gspart oder reinvestiert? Und wer isch eigentlich schlechter: Winti oder GC?
Unter Abweseheit vom Raphi lueged de David und de Tim zuedem uf d Niederlag vo Winti im Kantonsderby gege de FCZ und s gross akündete 1:1 vo GC in Thun.
8:57 FCW vs FCZ
28:39 FC Thun vs Grasshoppers
Während ide Stadt Züri vill Seich verzellt wird, stellt mer sich in Winti d Frag, wie das cha guet cho. Und das obwohl de FCW im Kantonsderby gege GC i letzter Sekunde no s 2:2 erzielt und sich en Punkt schnappt.
Au bi GC chamer nach dem Unendschiede nöd zfride si, für das isch d Leistig zguet gsi und usegluegt het zwenig. Usegluegt het bim FCZ no vill weniger: Frust, Fragezeiche und Vorderige sind d Stichwörter nachem 0:4 Debakel gege de Ufstiger Thun.
6:50 THUN??
10:43 FC Zürich - FC Thun
19:01 GCZ - FC Winterthur
Die ersti Rundi im Schwiizer «Cöp» isch gspillt: Winti cha in Schaffhuuse Selbstvertraue tanke und schlaht de SVS mit 5:0. Weniger überzügend sind de FCZ und GC: Je en 2:0 Sieg staht am Schluss zu Buche, trotzdem sind de Raphi und de Tim ganz und gar nöd zfride mit de Leistig. Zuedem luegemer i dere Episode no churz uf d Cup-Sensatione in Cham und Breitenrain.
6:10 Cöp allerlei
12:12 FC Wettswil-Bonstetten – FCZ
20:32 SV Schaffhausen – FC Winterthur
30:54 LAFC (Lachen-Altendorf) – GCZ
Grimasse-Hammel, Comeback-Steven und Katastrophe-Arnold: Es giht nach de 3. Rundi ide Super League einiges zbespreche. En mässig guet gluunte David trifft uf en immerno skeptische Raphi und de Tim het wie immer mässig Hoffnig und vill Akzeptanz.
7:27 St.Gallen - FC Winterthur
27:50 Servette - Grasshoppers
42:48 Lausanne - FC Zürich
Die erste Pünkt sind im Kanton Züri acho! Ide zweite Rundi vode neue Saison erkämpft sich Winti dihei en Punkt gege YB und au de FCZ chan sis Konto dank eme 1:1 in Luzern eröffne. Wiiterhin ohni Pünkt staht GC da, e erwartbari Niederlag bim Meister Basel rüehrt d Hoppers richtig Tabellenedi.
Zuedem i dere Folg: Neui Transfers, ersti Fazit zum Saisonstart und (sehr) vill Ungwüssheit.
9:40 FC Winterthur - YB
20:38 FC Basel - Grasshoppers
39:36 FC Luzern - FC Zürich
Neui Saison, neus Glück? Eher weniger. Alli drü Zürcher Clubs müend zum Saisonstart e 2:3 Niederlag istecke und das trotz Füehrig. De FCZ muess sich im Eröffnigsspiel geg Sion nacheme Brecher-Ussetzer gschlage ge, GC verlüürt trotz gueter erster Halbziit geg Luzern und Winti het 24/25-Flashbacks dank eme spate Siegtreffer vo Lausanne. Also alles bim Alte.
5:49 FC Zürich
27:07 Grasshoppers
38:50 Winti
Es isch Super League Wuche! Währenddem de David sini verdiente Ferie gnüsst, bespreched de Raphi und de Tim die aktuellne Geschehniss vode letzte Wuche. Transfers, Testspiel und s Out vom Schänder stönd ufem Traktandum.