2025年最後一集台長時間，我想對最近網路討論度真烈的「特權（privilege）」現象來回顧今年，咱敢有可能意識著家己，然後理解別人處境？對我來講，2025年是重新熟似家己的一年，感謝各種人事物的發生，落尾這集節目也會來回答聽眾朋友的call in。

最後，感謝今年各界聽眾朋友對阿愷之聲Podcast的支持和照顧，明年我猶原會努力放送，請繼續收聽！

► 廣告贊助｜有理文化《台灣ê故事—寫予咱ê島嶼》
https://www.books.com.tw/products/0011037478

► 阿愷之聲聽友會line社群｜
https://line.me/ti/g2/uS2PKqXbuTY7TvzDwtiACCQwj_kmQZb4VO0XRQ?utm_source=invitation&utm_medium=link_copy&utm_campaign=default

► 節目音樂｜鹿港新聲閣
► 贊助節目｜https://voiceofakai.oen.tw

「黃皙暎的《悠悠家園》是我這世人看過上精彩的小說！」－溪州阿倫

2025年最後一集阿愷之聲「文學烏亂濺」單元，再次邀請咱懷念的溪州阿倫，阮欲來討論今年由盧鴻金老師翻譯、春山出版韓國國寶級作家黃皙暎的小說《鐵道家族》，這本小說佇2024年閣入圍國際布克獎決選名單，透過家族四代人的故事寫出韓國的近代史，非常精彩！

今年八十三歲的黃皙暎一生傳奇，伊經歷過韓戰、民主化運動甚至也捌入獄，雖然時代的變動是無奈，但黃皙暎相信文學有可能回應時代，伊的作品豐富，甚至翻譯到世界各國語言。黃皙暎目前佇臺灣的翻譯本包括2002年由陳寧寧翻譯的《悠悠家園》、今年由林瑞翻譯的《5.18光州！光州！》閣有這本《鐵道家族》。這集節目準備對黃皙暎來介紹，到底伊的作品按怎寫出東亞史？黃皙暎和韓江這兩代作家各自用啥款的角度來寫韓國民主化運動？甚至，黃皙暎的作品如何對照咱台灣？

這集節目相當澎湃，雖然現子時火車無法度駛往滿洲的平原，但文學的列車會繼續前往彰化溪州。阿愷之聲文學烏亂濺製作已經來到四年半，這過程親像佇煙筒管靜坐抗議的李鎮五，但這條路有恁相陪收聽，阿愷之聲就會繼續堅持放送落去，再次感謝！

► 節目預告｜「開往溪州的文學列車」陳君宥製作
https://youtu.be/9UqmJt9OV9c?si=zxAR7qxWQ-P3cst3
► 來讀小說｜黃皙暎《鐵道家族》盧鴻金譯
https://www.books.com.tw/products/0011018605

► 節目音樂｜鹿港新聲閣
► 贊助節目｜https://voiceofakai.oen.tw

歡迎收聽阿愷之聲Podcast「文學烏亂濺」單元，這集欲來討論一本八十年前的經典小說，英國作家喬治・歐威爾寫的《動物農莊》，但本節目無預算觀落陰作家，所以咱歡迎這本冊的華語翻譯aka來自嘉義的廖靖。

今年逗點文創結社出版了《動物農莊》新譯本，但面對現子時至少二十本以上的譯本，重新翻譯的意義是啥？我更加好奇，對譯者廖靖來講，伊會按怎看這本小說？這本冊特別收錄的兩篇歐威爾的文章〈出版的自由〉和〈烏克蘭語譯本序〉，佇2025年的臺灣，重新讀歐威爾的小說，有啥款特殊的意義？

這集節目，恁甚至會使聽著譯者廖靖念原文的〈英格蘭之獸〉，內容精彩，緊來收聽！

► 來讀小說｜喬治・歐威爾《動物農莊》廖靖譯
https://www.books.com.tw/products/0011028982

► 來賓推薦｜安娜．方德《喬治．歐威爾之妻的隱形人生》、契科夫《凡尼亞舅舅》、潘克印的電影《我家的事》

► 特別感謝｜民雄一樂酒家場所支持
► 節目音樂｜鹿港新聲閣
► 贊助節目｜https://voiceofakai.oen.tw

阿愷之聲Podcast總算來到第200集，咱佇葡萄牙旅行的鹿港學姊總算會記著通轉來囉。這遍，學姊因為一場馬拉松來出發，但完全無規劃的旅途意外發生各種料想袂到的代誌，這集節目就來講頂个月攏佇歐洲的學姊到底發生啥款精彩的故事？

又閣是一年的年底，每一年攏親像一場走標（賽跑），過程有可能躊躇、甚至想欲放棄，但沿途拄著各種和你give me five的生份人，攏有可能是一段美麗的意外故事，予人繼續有氣力走落去。2025準備來到2026年，會記著對家己講一聲多謝！

► 節目音樂｜鹿港新聲閣
► 贊助節目｜https://voiceofakai.oen.tw

阿愷之聲Podcast「查埔人專題」這集邀請好朋友婦產科醫生彰化IU，阮準備對人類學和諮商心理背景的魏明毅老師彼本《靜寂工人》講起，到底𠢕（gâu）文化（男子氣概文化）按怎影響一个查埔囡仔的成長？續落來透過潘客印導演的電影《我家的事》，來講阮成長過程和阿爸、甚至和公司主管的互動經驗，這毋是一件簡單的代誌，透過冊和電影意識著這款文化造成的矛盾和辛苦，最後咱敢有可能轉來做家己？

照理講是人生勝利組的醫生，伊和阿爸的故事又閣是啥？

► 節目音樂｜鹿港新聲閣
► 贊助節目｜https://voiceofakai.oen.tw

阿愷之聲Podcast「查埔人專題」真歡喜邀請台中理解身心診所的精神科醫師陳璿丞，陳醫師本身會寫專欄也主持Podcast「從大腦到心理」。這集節目阮準備對最近一本社會學家許雅淑寫的新冊《何苦為男？》講起，到底父權文化按怎養成一位男性？為啥頂一个世代的阿爸無慣習表達情緒？最後，現代的咱敢有可能行出一條新男性之路？

這集節目非常精彩，也是阿愷之聲頭一遍佇身心診所會談室錄音！

► 節目重點

• 精神醫學按怎理解父權文化中成長的男性？
• 為啥電影中的中年阿爸攏遮恬靜？
• 孤單敢是一款病？
• 如何練習面對家己的情緒？
• 按怎陪伴厝內序大面對中年？

► 陳璿丞醫師推薦的冊｜許雅淑《何苦為男？》、張慧慈《長女病》和譚蕙芸《家鎖》

► 特別感謝｜引書店Podcast許皓甯學長牽線
► 節目音樂｜鹿港新聲閣
► 贊助節目｜https://voiceofakai.oen.tw

歡迎收聽阿愷之聲Podcast講音樂的「洛津浪音樂」單元，節目來賓是咱懷念的聲音溪州阿倫，這集欲來開講阮各自人生的台語歌！

啊恁人生的台語歌是佗一首？

► 節目講著的音樂｜

陳一郎：酒味菸味、歹命囝、行船人的純情曲／陳雷：往事就是我的安慰、心愛的甭哭／葉啟田：夜霧的港口、男性的復仇、三年前的我、回鄉的我／江蕙：五更鼓、藝界人生／西卿：相思燈／方瑞娥：風中燈、水車姑娘、黑玫瑰／黃乙玲：孤女的願望、臺北SAYONARA／許富凱：純情青春夢／鳳飛飛：白牡丹／林文隆：紅瓦厝／林強：向前行／詹雅雯：濁水溪之戀、人生公路、北極星、心悶／黃三元：佈田姑娘、思念故鄉的情人／澎恰恰：六十年前的一張批／伍佰：樹枝孤鳥、心愛的再會啦／李竺芯：拌拌咧、賀爾蒙／農村武裝青年：予你的歌／洪第七：懷念的播音員

► 相片提供｜Richie Chan
► 贊助節目｜https://voiceofakai.oen.tw

鳳凰風颱的暗暝，來聽這集阿愷之聲「台長時間」，我欲分享最近去南投竹山國中週會演講的感想，閣有EP195訪問音樂人林生祥的故事。交工樂隊的彼首〈風神125〉唱出足濟人（很多人）的心聲，這集節目台長就準備來分享我的風神125。

恁的人生中敢有親像〈風神125〉這款的歌？

► 節目音樂｜城鄉放送局樂隊〈凝望1935〉、〈風神125〉
► 贊助節目｜https://voiceofakai.oen.tw

本集阿愷之聲Podcast「洛津浪音樂」有夠緊張，哎，若講這世間無交工樂隊彼張《菊花夜行軍》專輯，就無後來的阿愷之聲。彼張專輯使我對美濃看著我的家鄉鹿港，並開始致意地方的故事和語言，本集來賓就是我敬重的音樂人林生祥，哎，我的心情實在澎湃。

鍾理和是誰？囡仔時，生祥和阿母作伙去美濃戲院看彼齣《原鄉人》，伊第一擺看著原來農村的勞動生活會使搬成電影，這是伊接觸鍾理和文學的第一印象。2010年，生祥完成《大地書房》專輯，這是一張以鍾理和的文學作品成作基礎的集體創作，除了邀請鍾理和家族後代共同寫詞，生祥甚至改造傳統月琴，結合bass和吉他作伙唱出當代的山歌。今年十一月，也是《大地書房》十五週年、鍾理和先生百一歲生日忌，生祥樂隊準備來到大學巡迴，繼續唱出這片土地的故事。

這个時代唱經典文學敢有意義？無恁來聽看覓！

► 節目重點

• 頭一擺接觸同鄉鍾理和先生文學的經驗？
• 啥款的機緣創作《大地書房》專輯？傳統月琴的改造？
• 生祥最近看過佗一本文學作品？
• 當代討論經典文學的意義？
• 15週年專輯巡迴對生祥樂團的意義？

► 校園巡迴（頭一日放電影，第二日演唱會）

11/12-11/13 靜宜大學 ft. 鬥鬧熱走唱隊
11/19-11/20 東華大學 ft. 吳明益＆裝咖人
11/25-11/26 屏東大學 ft. 山狗大後生樂團
11/27-11/28 成功大學 ft. 農村武裝青年
12/11-12/12 臺北教育大學 ft. 吳志寧

► 節目音樂｜山歌一唱鍾理和、山精饒新華
► 特別感謝｜劉逸姿的牽成、鄭宇焱和張亞喬的相片
► 贊助節目｜https://voiceofakai.oen.tw

阿愷之聲Podcast上經典的單元「文學烏亂濺」已經滿四週年，時間過了真緊，這集節目邀請著單元固定來賓，也是阿愷彰化高中的優秀學弟秀水奕瑄aka校刊社葉公來分享這幾年阮做伙講過的冊，閣有未來想欲挑戰的文學作品，講完實在充滿期待啊！

其實文學單元無好做，這一路上感謝有奕瑄、阿倫、學姊閣有捌予阿愷揣來節目講冊的好朋友，我一直希望會使透過講文學，趁機會瞭解彼个咱猶未經歷過的生命經驗，而且講完對咱家己有意義、有成長。我熟似奕瑄時伊閣咧讀高中，葉公是一位讀文學、辦校刊、衝社會運動的少年家，後來伊走入社會工作的專業體制，最近閣去讀研究所，想欲繼續探問伊對社會的疑問。這集節目，阮就欲來講這四年來，透過講文學，阮各自的改變和思考。

► 和奕瑄做伙講過的冊｜

EP36 鍾永豐《菊花如何夜行軍》
EP64 是枝裕和《雲沒有回答》
EP77 米蘭昆德拉《生命中不能承受之輕》
EP78-79 魏明毅《受苦的倒影》＆作者對談
EP121 卡繆《正義者》
EP124 陳映真〈山路〉
SP6 黃瀚嶢《沒口之河》
SP7 李金蓮《暗路》
EP150 韓江《少年來了》

► 節目音樂｜鹿港新聲閣
► 贊助節目｜https://voiceofakai.oen.tw

歡迎收聽阿愷之聲Podcast「大武壠放送」特別單元，這是西拉雅主題的最後一集，咱來到台南白河的六重溪部落，節目來賓是六重溪平埔協會總幹事潘麒宇，聽講伊的身世是因為和小弟搶遙控時意外知影？

大武壠族以前攏予人叫是西拉雅族的分支，隨著新的研究發現，大武壠其實有家己的話、家己的衫，毋過文化復振之路無簡單。麒宇講，伊真後悔當時無佇阿媽在世時好好紀錄部落的話和記持（記憶），後來伊真打拼推廣部落文化，甚至有囡仔了後，除了帶囡仔轉來部落參加祭典，閣予囡仔一个族名，麒宇希望後一代的成長過程會使有部落文化的陪伴，未來是一个會使自然做家己的時代。

這集節目真感動，緊來聽麒宇的故事，也感謝各位收聽這六集特別單元，咱來聽著臺灣文化豐富的聲音！

► 特別感謝｜西拉雅國家風景區管理處、原典創思規劃顧問有限公司
► 來賓點播｜珂拉琪的歌〈maliyang〉
► 節目音樂｜鹿港新聲閣
► 贊助節目｜https://voiceofakai.oen.tw

歡迎收聽阿愷之聲Podcast「西拉雅放送」特別單元，第五集咱來去台南官田，節目來賓是臺南市番仔田西拉雅族協會理事長戴鳳鳴先生，來聽理事長講起這段社區起造阿立祖公廨的故事！

台南官田出名人，聽講鳳鳴兄的小學同學是阿扁總統？這集節目阮對來賓的囡仔時講起，是啥款機緣予鳳鳴兄瞭解家己是西拉雅族？節目佇復興宮錄音，這是一間關帝爺廟，有意思的是，廟裏除了拜漢人的神明，閣有一支支祭拜阿立祖的矸仔（瓶子），這是啥原因？緊來聽這集節目，咱對番仔田部落的公廨起造，瞭解西拉雅的故事！

► 特別感謝｜西拉雅國家風景區管理處、原典創思規劃顧問有限公司
► 節目音樂｜鹿港新聲閣
► 贊助節目｜https://voiceofakai.oen.tw

本集阿愷之聲Podcast「台長時間」完全無任何悲傷、怨嘆和可惜，顛倒是滿滿的歡喜和感恩。自從知影阿愷之聲入圍今年第60屆廣播金鐘獎Podcast類藝術文化獎了後，頒獎典禮前這一个月時間，根本就是一逝奇幻旅程，各種意外感動的故事有了發生。

感謝廣播金鐘獎，予我熟似各界優秀的廣播人和Podcaster，準備參加典禮的過程中，甚至增加阮厝內逐家人的感情，閣有工作團隊的志氣。無得獎，其實予我瞭解，原來已經有這濟（多）人佮意（喜歡）阿愷／阿愷之聲，我有夠歡喜、有夠感動，因為入圍金鐘獎，這个節目我會更加有信心繼續努力放送、製作落去！

► 關鍵字｜ 下港女子《鴿在吹雞歸》Podcast、米莎X地下河《百夜生》專輯、蕭邦鋼琴大賽、李雲迪、蕭邦第一號鋼琴協奏曲、Nakao Eki Pacidal 的小說《蕉葉與樹的約定》

► 特別感謝｜ 北斗Teresa的髮妝、虎尾巧穩電繡的建富哥
► 節目音樂｜ 鹿港新聲閣
► 贊助節目｜ https://voiceofakai.oen.tw

► 歡迎加入阿愷之聲聽友會LINE社群｜ https://line.me/ti/g2/uS2PKqXbuTY7TvzDwtiACCQwj_kmQZb4VO0XRQ?utm_source=invitation&utm_medium=link_copy&utm_campaign=default

歡迎收聽阿愷之聲Podcast「西拉雅放送」特別單元，第四集咱來去台南新化的口埤部落，節目來賓是台南市西拉雅文化山城合作社營造員高麗貞，來聽麗貞姐按怎認捌家己西拉雅族群的故事？

瞭解西拉雅族群的歷史，對家己的生活有啥改變？我問麗貞姐，伊對第一遍聽著口埤部落前輩，佇日本時代面對民族音樂學者淺井惠倫唱起部落古謠的心情講起，彼種感動的心情予麗貞姐想欲為部落做一寡代誌。伊開始訪問部落序大和田野調查，甚至蹽落去做傳統十字繡，繡到目睭花，到底這是啥款的故事？緊來聽麗貞姐按怎將家己的聲揣轉來！

► 特別感謝｜西拉雅國家風景區管理處、原典創思規劃顧問有限公司
► 節目音樂｜鹿港新聲閣
► 贊助節目｜https://voiceofakai.oen.tw

這集阿愷之聲Podcast「空中泡茶間」單元邀請了入圍今年廣播金鐘獎Podcast類青少年節目獎的「週報時光機」主持人派翠克，阮準備佇空中討論：「到底金鐘獎頒獎典禮彼工欲穿啥啊？ 」

其實大多數的Podcaster攏是士農工商，有閒才來做節目，派翠克一開始做Podcast時按怎攏想袂到後來有廣播金鐘獎會使參加。伊本來只是做家己有興趣的主題，對生活歷史到品牌故事，戇戇仔做，一做竟然就做五年。

同款攏是節目主持人，我真好奇派翠克按怎面對收聽率的寂寞？甚至敢有想無主題通講的一工？這集節目阮準備討論主持人的「後台」，講到最後，真正好你加在阮攏有堅持將節目做落去，按呢才有機會入圍廣播金鐘，甚至煩惱欲穿啥的問題。

哎，感觸真深，緊來收聽這集！

► 節目音樂｜鹿港新聲閣
► 贊助節目｜https://voiceofakai.oen.tw

歡迎收聽阿愷之聲Podcast「西拉雅放送」特別單元，第三集咱來去台南左鎮的公舘社區，節目來賓是今年92歲的李伯芬阿公，這是本台放送以來訪問過上少年的來賓，身體勇健的阿公，平常時是按怎保養？

錄音現場有兩雙李伯芬阿公做的木屐，這是伊出世佇日本時代的記持（記憶），咱來賓除了手真巧，對傳統八音閣真有天份。李伯芬阿公本身信教會，以前庄內有一个八音團，有時教會有活動就會演奏，到底是啥款的時空背景，才有這款的文化結合？趕緊來收聽岡仔林的聲音！

► 特別感謝｜西拉雅國家風景區管理處、原典創思規劃顧問有限公司
► 節目音樂｜鹿港新聲閣
► 贊助節目｜https://voiceofakai.oen.tw

這集阿愷之聲Podcast「文學烏亂濺」單元欲來講一本最近討論度十足的冊，是作家張慧慈aka小花媽寫的《長女病》，節目特別邀請鹿港學姊做伙來講冊，自頭講起，到底長女病是啥？這款病敢會要人命？

這本冊作家對家己和老母的故事講起，這對攏是長女的母仔囝，張慧慈按怎知覺女性佇家庭中的處境？冊中收錄各種長女的故事，但咱呢讀呢感覺：欸！這根本就是我身軀邊某某人啊！長女病是傳統社會對長女的期待，但敢有可能戒掉？這本冊提供咱真濟（多）思考的角度。

緊來收聽這集節目，絕對精彩！

► 好冊推薦｜張慧慈《長女病》
https://www.books.com.tw/products/0011017053

► 節目音樂｜鹿港新聲閣
► 贊助節目｜https://voiceofakai.oen.tw

歡迎收聽阿愷之聲Podcast「西拉雅放送」特別單元，第二集咱來去台南大內的頭社部落，節目來賓是頭社西拉雅文化發展協會總幹事毛淑慧，錄音空間感謝頭社教會支持，故事先對剃頭店的查某囝講起。

是啥款的機緣，退休了後的淑慧姊會想欲轉來瞭解頭社部落？對嫁出去的媳婦來講，重新走揣西拉雅身份的意義是啥？傳統的十字繡又閣按怎佇淑慧姐的手中，變成一幅精彩的人生圖畫？緊來收聽這集！

► 活動宣傳｜2025年9月26-28日臺灣部落觀光嘉年華佇台北車頭，現場有吉貝耍國小、公舘社區X歸途拔馬、頭社部落，歡迎來參加！

► 特別感謝｜西拉雅國家風景區管理處、原典創思規劃顧問有限公司
► 節目音樂｜鹿港新聲閣
► 贊助節目｜https://voiceofakai.oen.tw

本集阿愷之聲Podcast「空中泡茶間」欲來追一條溪，追一條屬於彰化運命的濁水溪。節目來賓是影像創作者、也是彰化大城人許震唐，作伙開講的閣有逐家人懷念的溪州阿倫，阮欲討論最近春山出版的新冊《追一條溪：濁水溪河畔記事》，這是阿唐兄的影像書寫作品，相當精彩。

按怎追一條溪？阿唐兄對出海口掠鰻栽的人追起，經過拜溪王、種香菇和收菸葉的人，伊來到中游熟似砂石仔車司機，懷疑人類和自然交換條件的集集攔河堰，最後來到水源頭揣著傳說。十幾年來阿唐兄用鏡頭走揣觀察，以彰化式的溫柔理解沈重的生態議題，伊的影像會講話。

緊來收聽三个彰化人話講濁水溪！

► 節目重點

• 彰化人性命的終點攏會來到濁水溪？
• 為啥欲一直追濁水溪？
• 2025年當代討論濁水溪的意義？
• 對《南風》到《追一條溪》的內心轉變？
• 創作時會看啥款的冊揣靈感？

► 好冊推薦｜許震唐《追一條溪：濁水溪河畔記事》
https://www.books.com.tw/products/0011026903

► 節目音樂｜鹿港新聲閣
► 贊助節目｜https://voiceofakai.oen.tw

歡迎收聽阿愷之聲Podcast「西拉雅放送」，頭一集咱來去台南東山的吉貝耍部落，節目來賓是台南市西拉雅部落發展促進會理事長段洪坤老師，聽講段老師認捌家己族群歷史的機緣，竟然是因為文學創作？

為啥段洪坤老師會講家己的母語是台語？這集節目就對語言講起，為啥物欲講阿爸的話？做阿母的衫？緊來聽這段自我尋根的故事。

► 活動宣傳｜2025年9月26-28日臺灣部落觀光嘉年華佇台北車頭，現場有吉貝耍國小、公舘社區X歸途拔馬、頭社部落，歡迎來參加！

► 特別感謝｜交通部觀光署西拉雅國家風景區管理處、原典創思規劃顧問有限公司
► 節目音樂｜鹿港新聲閣
► 贊助節目｜https://voiceofakai.oen.tw